موقع رواق

هو واحد من أوائل المنصات العربية للتعليم عن بُعِد، بيقدم كورسات باللغة العربية في أكتر من مجال وبصورة مجانية. النهاردة هنتكلم عن موقع “رواق” https://www.rwaq.org/
موقع رواق بيقدم كورسات في مجالات كتير. أول ما الموقع دة اتعمل كانت كورساته في علوم الحاسب، والعلوم الشرعية، والمواهب والإبداع بس، لكن مع الوقت بقى فيه مجالات أكتر زي مجال إدارة الأعمال، ومجال التكنولوچيا بفروعها المختلفة.
كمان طريقة التسجيل على الموقع مش مرهقة ليك خالص، كل اللي عليك تعمله هي إنه يكون عندك إيميل، فهتدخل الموقع بإيميلك وهتختار الكورس اللي أنت حابب تدرسه، بعدها هتجيلك رسالة على إيميلك عشان تتأكد إنك سجلت خلاص وتبدأ بقى في الكورس.
الكورسات هناك نظامها لطيف جدًا، أول حاجة هي عبارة عن مقاطع فيديو مدتها من 7 – 15 دقيقة إسبوعيًا. بعد كدة المحاضرات دي بتتأرشف عشان لو حابب ترجعلها في أي وقت.
 
وعشان يتأكدوا إنك متابع معاهم أول بأول، فهم بيعملوا إمتحان بعد كل محاضرة من المحاضرات الاسبوعية دي، وكمان في الأخر بيعملوا إمتحان شامل وبيبلغوك بالدرجة بعد فترة. كل دة بالإضافة إلى أن فيه واجبات منزلية بتتطلب منك بعد كل محاضرة، والواجبات دي طبعًا عليها جزء من الدرجة الكلية.
كورسات رواق مش للطلبة بس، هي كمان للمحاضرين واللي عايزين يزودوا معلوماتهم، وساعتها كل اللي عليك إنك تبلغهم قبلها إنك هتلتحق بالكورس كمحاضر.
الموقع بيقدم شهادات، بس للأسف مش شهادات من جهات موثوقة، وطبعًا دة عشان لسة في بداياته بس، بالإضافة إلى إن مش كل المواد اللي على الموقع فيها شهادات، فعشان كدة بعد ما هتخلص كل كورس هتستلم شهادته في حالة توافر شهادة ليه بس.